夠哂架勢Farewell 飯 － 大公館

班同事成日都話去大公館食，等左勁耐都係得個講字，最近終於真係去喇！

淨係見到門口個招牌都知間野幾有氣派喇

走廊好有酒店既感覺

第一道菜叫左蜜汁叉燒拼燒肉。叉燒外面非常香脆，加上蜜汁同嫩口薄片既叉燒肉，即刻有種漂漂然既感覺。燒肉皮燒到金黃香脆，燒肉半肥瘦，只要輕輕咀嚼就已經融化。如果唔係咁多同事share 真係想食多件。

第二碟係剌猬仔叉燒飽，一隻隻刺猬眼仔look look，唔食淨係睇佢地個得意樣都飽喇真係…

一上菜我同班同事就即刻攞部手機出黎係咁影相。D 飽有咁得意既外形，師傅們一定用左唔少心機去整。影完相又係時候開餐，食到入面好多叉燒，口感都係好軟熟，仲有好多蠔油醬汁，食到個個lam lam 脷！

咁得意，整多個close-up 先！

之後仲有鮮蝦腸粉。腸粉皮都唔算太厚，趁熱食都幾滑，蝦仁好爽口。

好多條魚呀！原來係芝士三文魚酥。雖然睇落好似魚，但係入面其實係蝦肉同芝士。 如果冇左條蝦尾，會唔會覺得好似雞批呢？我個同事食完第一句就話：“食落好似雞批！” 本身都不以為意，食左啖，又真係幾似喎衰鬼。不過都真係幾好食既，筆者最鐘意食批／撻個d。 

呢餐都真係幾滿足，係貴左d 咁解。同埋呢餐其實係farewell 飯，食完個餐之後會有個同事離開我地喇，希望佢新工順順利利喇。