認真制作私房菜 - 榮哥廚房私房菜
呢排約番個好耐冇見既朋友，原來大家工作地點都好近。難得有朋友咁近觀塘就梗係唔可以放過觀塘工廈既美食喇！
榮哥呢間餐廳都係有朋友介紹先知，原來之前都幾多名人去過，睇黎呢間野都唔簡單…
因為事前已經同店員定好左今晚既餐單，可以乖乖地坐低等店員起菜就得(你地都可以咁做架！)
首先介紹左最多人推薦既蝦球水芙蓉。爽口鮮蝦既再配以嫩滑口感既水蛋，外觀精美而清新。
盅湯都落足哂料。一個係哈密瓜螺頭黑毛豚肉湯，另一個係土伏苓鑽地老鼠黑毛豚肉湯。真係聽個名都知勁。哈密瓜就係淺色d 個碗，味道相比另一盅清淡，感覺健康清新。土伏苓個碗顏色明顯較深，中藥味會重d，但對身體非常有益。
食番幾碟冷盤開下胃都唔錯。分别係涼伴木耳，紫薯淮山 同 芝蔴醬沙律有機菜。
仲有一人一隻茶燻流心蛋伴魚子醬配厚切茄子。流心蛋好滑，做到啱啱好既流心口感，令人回味。茄子配上魚子醬同獨有醬料，味道非常刺激。好想食多舊，但下一道菜又黎喇……
呢碟遠年新會陳皮骨炸得非常鬆脆，加上咸咸地既味道好開胃，餸飯一流。
食完咁多肉係時候食番D 蔬菜喇。呢個米王湯浸菜苗非常清爽，口感好新鮮。仲有少許米王湯伴碟，清得黎又唔會食到口淡淡。
食左咁多道菜，又係時候食飯喇。今次要食既係荷香蒜蓉海班片原籠蒸鴛鴦飯。呢個飯又用蒸籠又有荷葉，將d 荷葉香同精華包住哂。加埋新鮮嫩滑既海班片同紅米飯加白飯，好味得黎又健康，正！
最後食多幾舊生果，清下腸胃咁呢餐私房菜就差唔多喇。
當晚點左既餐單
其他菜單
店內環境
榮哥廚房私房菜
電話: 23456389
地址: 觀塘觀塘道436-484號官塘工業中心3期4樓L室
Comments
Post a Comment