船長同你食盡意法日 - 船長意法日餐廳

係元朗“搵食”既時候，你永遠都會有一種煩惱，就係選擇多到唔知食咩好！係呢d 時候，筆者就會黎到西菁街，因為各國菜式都有齊可以慢慢揀。

今次去左食船長餐廳，入面意式法式日式咩都有，總有一款啱口味！

坐低叫完野食之後，第一碟來到既就係 蜜燒葡萄柚子雞翼。用蜜糖燒完既表面非常脆口，仲有點點芝蔴在表面，十分香口。雞翼仲有少少柚子醬令雞翼脆得黎唔會太熱氣，仲有d 清甜果味添！

胡麻手撕雞 雞肉撕得好幼細，加上芝麻醬既點綴，凍食效果不錯！

之後仲有脆卜卜南瓜薯餅。表面既吉列皮新鮮炸好，極為香脆可口，加上內裡咬開陣陣南瓜蓉，完全做到外脆內軟既效果。

食完幾個小食之後，又到主食出場喇!!

呢個龍蝦汁海鮮珍珠飯 重頭戲一定係個兩隻大蟹鉗，大大隻幾多肉，絕對唔係得海鮮小蝦毛大雜燴個種。龍蝦汁多多，唔太“傑”身，蝦味幾出啱啱好。

想食咖喱？呢到出品既咖喱水準都唔差，做到印度餐廳 7, 8 成水準。筆者叫左個咖喱牛筋腩，d 咖喱又濃又香，以為細細兜，其實落足料。入面d 牛腩多過薯仔多多聲，本來配烤餅，都要叫番個飯黎撈汁！

如果兩三個人去，又想食pizza 的話，呢到啱哂你。呢到既pizza 係細size, 切開4塊1人1件啱啱好！筆者食左個東洋天雞烤焗pizza，細得黎料落得好足。中間一大陣芝士，雞塊成個pizza 都有，加埋係薄皮pizza，好脆口，筆者至like !

最後飲番杯 葡萄柚子芒星梳打，冰凍得黎又潤喉。

食到飽哂都唔駛好貴，$300 有找，仲飽過放題。下次諗唔到食咩餐廳既呢到真係啱哂，因為你想食既，呢到都會有。