日本料理Omakase 體驗之旅 - 鮨文

剛好有朋友升職，想請我食一餐好既，點知竟然介紹左一家身為元朗人既我都唔太認識既日本料理 - 鮨文。餐廳主打Omakase，即一個刺身師傅，服務幾位客人既日本料理。

一入到去，我同朋友都被餐廳內既日本風裝潢同有禮既師傅們所震驚，因為餐廳內既環境仿如置身日本：專業既日本師傅，寧靜既環境，細心而聲線溫和既侍應。為了尊重環境，我同朋友都不敢多説話。

先看一看Menu 快快點菜，之後就開始我地既Omakase !

第一道食品係小食，茶碗蒸(即蒸蛋)。店員用上了精置既器具，食物表面放上了一陣陣既金箔，外觀上加添不少分數。上面是帶子絲加上湯汁，下面是白滑蒸蛋。因為有湯汁關係，蒸蛋味道不會太單調，而且一直都可以享受當中既海洋鮮味，整體清淡易入口。

之後係毛蟹肉。上面加左d 柚子醬，味道甜甜地。蟹肉非常清爽鮮甜，每一條蟹棒都以一絲絲既方式呈現。

下一道菜好健康，係炭燒松茸。師傅話而家係當造先會咁大隻。本身諗住菇唔會有咩味，但呢種就有一種香菇味，感覺好特别。師傅話連唔鐘意食菇既人都會愛上。

食左幾道菜，師傅都有向我地介紹每菜要注意既地方，同菜式特色。我地之後就追問一D 關於食物既問題, 師傅亦因此而講多左野, 氣氛即刻好左好多。大家變得有講有笑, 感覺非常親切友好。

之後就有我諗都冇諗過咁好食既帆立貝天婦羅，粒帆立貝直徑真係有兩節手指頭咁闊！呢到用既紫菜仲要係前所未有咁脆！師傅話佢地d 紫菜都係用特有既方法保持紫菜乾爽，所以食起黎係非常脆口，超讚！

呢個好似腦既物體，叫 “白子”，即係咩？嘻嘻，有興趣自己Google 一下喇，好補架…
最初係有少少驚唔敢試，之後食左啖覺得都幾滑幾軟，仲有d creamy，還可以。之前都未試過呢d 日本食物，幾特别。

食哂前菜小食之後終於到Sushi。師傅話，sushi 應該飯細舊d，刺身包得住飯團先啱。佢之後分别整左八種唔同既壽司，有墨魚，吞拿魚，魚籽，火炙刺身等等。

又話有8種既? 咁第八種呢??

登 ! 登 ! 登 ! 登 !!!

最後一種係師傅為我地整左個材料仲多過D 飯既特級馬糞海膽壽司！！！師傅都係因為個日同佢有講有笑，幾開心先會整到咁大件。可遇不可求，真係超興奮！

之後係手卷，係將刺身魚肉整成肉末，放入特脆紫菜入面。紫菜仲好細心地中間有一條紫菜條防止手卷餡一路食一路向下滑。師傅仲話，手卷一定要三啖內食哂，唔係就食唔到原來既風味

包好之後就係咁樣

打直放入口到三啖食完

一路食D 餡都唔會向下滑, 正!

之後飲埋個鮮味清湯，暖一暖個身

再食多個日本直送哈蜜瓜，好清甜!

最後同師傅碰杯飲一飲清酒，成個Omakase 料理就正式完結。真係諗都冇諗過香港(仲要係元朗)會有咁高尚既日式料理店，真係好似直接去左日本咁正!

聽講師傅之後仲會去紅磡開分店，唔知到時會有咩好野比一眾食客呢？